Mga Kahihinatnan ng Pag-overstay sa Visa sa China

Ang overstaying o ilegal na paninirahan ay nangangahulugang pumasok ang isang tao sa bansa gamit ang balidong visa o residence permit ngunit nanatili roon lampas sa petsa ng pag-expire nito.

Halimbawa, kung pumasok sa China ang isang dayuhan noong Agosto 20 gamit ang 30-day visa, dapat siyang umalis sa o bago ang Setyembre 19. Ituturing siyang nag-overstay kung mananatili siya sa China sa o pagkalipas ng 00:00 noong Setyembre 20.

Nagtanong ang ilang tao: “Paano kung aalis ang flight ko ng Setyembre 20, 1:00 AM, pero pupunta ako sa immigration ng Setyembre 19, 09:00 PM?”

Ang sagot ay “Ituturing kang nag-overstay sa visa dahil mas huli sa oras ng pag-expire ng visa mo ang nakatakdang oras sa departure ticket; kaya hindi ka makalalampas sa immigration nang hindi dumaraan sa proseso para sa overstay.” Gayunman, kung 11:00 PM ng Setyembre 19 ang oras ng flight departure mo ngunit binago ng carrier ang schedule sa 1:00 AM ng Setyembre 20 dahil sa delay, hindi ka ituturing na nag-overstay.

Sinasabi ng ilan na may grace period para sa visa overstaying, at mali ang sagot. WALANG-WALA talagang grace period para sa overstay ng visa sa China at itinuturing itong malubhang offense. Maaaring may kaunting clemency kung nag-overstay ka ng visa nang maximum na isa o dalawang araw kung pupunta ka sa Exit and Entry Administration ng Local Public Security Bureau upang humingi ng paumanhin at ipaliwanag ang mga dahilan. Tandaang maging magalang, humingi ng tawad, at anuman ang mangyari ay huwag tutulan ang anumang desisyon dahil ikaw na ang mali at lalo lamang lalala ang sitwasyon mo.

Kung nag-overstay ka sa visa, may magkakaibang antas ng parusa batay sa haba ng overstay.

1. Kung maikli ang overstay (hindi lalampas sa isang buwan), bibigyan ka ng babala, pagmumultahin, at maaaring bigyan ng exit visa. Itinakda ang penalty sa 500 RMB bawat araw hanggang maximum na 10,000 RMB. Dapat bayaran nang cash o gamit ang lokal na Chinese bank card ang penalty. Hindi tinatanggap ang mga card na inisyu sa ibang bansa.

2. Kung lampas isang buwan ang overstay, mas mabigat ang mga kahihinatnan: ikukulong ka nang 5 hanggang 15 araw at saka ide-deport pabalik sa home country. Mas malala pa, nanganganib kang ma-blacklist o ma-ban sa pagpasok sa China nang hanggang sampung taon. Hindi pa kabilang dito na maaaring makaapekto ang masamang rekord na ito sa aplikasyon ng visa para sa ibang bansa dahil nakatala ito sa database na pinagsasaluhan ng lahat ng embahada at konsulado sa buong mundo.

Dahil nailatag na iyon, kung talagang nasa overstay situation ka ay dapat kang mag-report sa local police station sa lalong madaling panahon, bayaran ang penalty, saka mag-apply para sa exit permit upang makaalis ng bansa.

Tinutukoy ng officer na sangkot sa kaso mo ang eksaktong consequence. Halimbawa, sa situation two, maaari kang magkaroon ng parehong punishment gaya sa situation one o mas malala. May iba pang factor na maaaring isaalang-alang ng officer gaya ng uri ng visa, visa history at entry/exit, nasyonalidad, personality, at kung paano mo hinahawakan ang sitwasyon.

Mahalagang tandaan na bagaman nakikinabang ang mga German, American, British, at mamamayan ng maraming bansa sa visa-waiver entry ng kani-kanilang pasaporte sa maraming bansa, hindi nito ginagarantiyahan ang pagpasok. Ibig sabihin lamang ay hindi kailangan ng visa sa short-term visit. Maaari pa ring tanggihan ng border officer ang pagpasok mo. Kung nasa database ang sitwasyon mo mula China, maaari itong magdagdag ng problema sa pagpunta sa ibang bansa.

Upang maiwasan ang overstay, dapat mong tandaan ang date ng pagpasok sa bansa batay sa entry stamp sa passport at haba ng visa mo. Tiyaking itakda ang departure nang hindi bababa sa 2 o 3 araw nang mas maaga upang maiwasan ang flight delay o cancellation.

Kung may residence permit ka, maglaan nang maaga ng sapat na oras upang isumite at matanggap ang kaugnay na mga dokumento bago muling mag-apply. Mahalagang tandaan na magkakaiba ang requirement ng mga lungsod.

Sa ilang lungsod gaya ng Shanghai, walang problema hangga't naisumite ang residence-permit application bago ang petsa ng expiry. Ngunit hindi ito totoo sa ibang lungsod kung saan kailangang makumpleto ang buong proseso bago iyon. Bukod dito, mula pa nitong unang bahagi ng taon, kailangang isumite para sa renewal ang residence-permit application sa loob ng 30-araw na panahon bago ang expiry, ngunit mas mahigpit itong ipinapatupad ng ilang lungsod kaysa iba.

Source: Ikbal &Julian para saKudosbay酷豆湾